Hekayəsi olan şeylər gözəldir. “Rodriqonun gitara konserti” mahnısının hekayəsi var. Deyirlər, Deniz Gezmiş asılanda bu mahnını istəyib son arzu kimi. Mahnıya qulaq asanda adamın keçdiyi həyat yolu yadına düşür. Bu həyat yolunda böyük adamlar gözə dəyir. Bəziləri hələ də həyatındadır. Məsələn, Rəşad dərhal dəydi gözümə. Ad günüdür deyə.
Artıq mübarizə adamları gəncliyini türmədə tərk edir.
Rəşad da 29-u yola saldı. Düzdür, beyin hər zaman gənc qalacaq, bəlkə də. Amma
biz fiziki, bioloji varlıqlarıq. Bədən öz sözünü deyir. Türmələrdə, betonların,
barmaqlıqların arasında illərimizi oğurlayırlar, xərcləyirlər.
Rəşadın da hekayəsi var. Onun hekayəsi bu ölkədə hər kəsin
mübarizəyə qoşulmasına əsasdır. Rəşad riyaziyyatçıdır. ODTÜ-nü qurtarıb. Riyaziyyat
sahəsində elmi işlərlə məşğul olmaq istəyir. Amma deyir ki, ölkədəki durum
imkan vermir. Bu vəziyyəti dəyişmək lazımdır ki, istədiyinlə də rahat məşğul
olasan. Yoxsa sənin yanında insan hüquqları tapdalana, sən daxil olmaqla
milyonlarla vətəndaş adam yerinə qoyulmaya, sən də durub professor-filan adı
alasan.
Hər kəsə aiddir axı bu – müəllim, fəhlə, mühəndis, tələbə…
Yalnız keçinmək, zəruri ehtiyac üçün işləyib mübarizə aparmalıyıq, çünki cəmiyyəti
düzəltmək şəxsi məqsədlərimizdən öndə gəlir. Rəşad bunu çoxdan dərk edib. Ona görə
də indi türmədə xərclənən ömrünü ucuz verdiyini düşünmür məncə. Əvəzində “Son
söz”ümüzdə dediyimiz kimi sərmayəmizi yatırırıq bu ölkənin azadlığı, gələcəyi
üçün.
Rəşad haqqında o qədər
yazmaq olar ki. Yazıda rabitəsizlik də buna görədir. Haqqında danışacağım o qədər
şey var ikən, nə deyim ki. Dustaq maşınlarında, məhkəmə zirzəmilərində, Kürdəxanının
eyni korpusunun müxtəlif mərtəbələrində (axırıncı dəfə də Rəşadı onda görmüşəm
deyəsən – 3-cü mərtəbədən baxanda barmaqlıqların arasından gördüm, 2-ci mərtəbədə
telefondan qayıdırdı. 4 ay yarımdır), mitinqlərdə formalaşmış xatirələr bu
yazıya sığmaz ki. Həm də niyə xatirə yazım ki. Hər şey davam edir. Tezliklə yenə
sözün həqiqi mənasında çiyin-çiyinə olacağıq.
Balaca boyu ilə zarafat
edirik həmişə. Amma təmkini, dərin düşüncəsi, həmişə hörmət qazanan davranışı
ilə Rəşad bir başqadır. Həm də Rəşad var deyə, heç vaxt bu mübarizənin bitməyəcəyinə
əminəm. Rəşad bundan sonra mübarizədə olsa, olmasa da, onun yazdığı iz bu mübarizəni
yaşadacaq gücdədir.
Rəşadətin 30 yaşında ona
Günel Mövluddan “30 yaşın şeiri”ni yazıb göndərmişdim. Rodriqonun bu konserti Rəşadətin
ən sevimlilərindəndir, yeri gəlmişkən. Rəşad üçün də yazım. Rəsmi gəncliyini türmədə
tərk edənlərin himni kimi bir şeydir.
İndi mənim başıma
Od ələnən yaşımdı,
Söykənib bir divara
Güllələnən yaşımdı.
Sərxoş oyanmalıyam
Özgə yataqlarında,
Özümü asmalıyam
Otel otaqlarında.
Bir sevgili uduzub
Dost itirən yaşdayam
Gecə küçədən evə
İt gətirən yaşdayam.
Mənsə hər səhər evdən
Yorğun, əzik çıxıram,
Ayaqqabım narahat
Üstüm nazik çıxıram.
Boğazımı göynədən
Qəhər yox, soyuq olur,
İt yerinə əlimdə
Bir buzlu toyuq olur.
Comments
Post a Comment