Müxalifət
bizim dildə nəyinsə, kiminsə əleyhdarı olmaq kimi anlaşılır. Cəmiyyətimizdə isə
hökumətin əleyhdarı olan bir qrup adam kimi başa düşülür. Diktaturalara, qəddar
rejimlərə, həm də uzun müddət müxalif olmaq şərəfdir. Bəs müxalifət yalnız
siyasi hakimiyyət nöqteyi-nəzərindənmi dəyərləndirilməlidir. Normal ölkələrdə,
yəqin ki, hə. Bizim onlarla işimiz yoxdur. Biz üçüncü dünyanın da ən bərbad ölkələrindən
birinin sakinləriyik.
Bizdə
iqtidar 24 ildir, dəyişilməz olaraq, davam edir. Bu illər ərzində balaca
tariximizdə qazana bildiyimiz dəyərləri məhv etməklə, cəmiyyətin mənəviyyatını
aşındırmaqla, deqredasiyanı dərinləşdirməklə məşğul olublar. Onların vurduğu
ziyan yalnız parlamentin təyinatlı deputatlarla doldurulmasından, korrupsiyanın
tüğyan etməsindən ibarət deyil. Bu, 1-2 il davam etsə idi, yalnız bu görünənlərdən
ibarət olardı. amma 24 il çox böyük dövrdür və ziyan hiss etmədiyimiz
miqyasdadır, çox dəhşətlidir.
Misallarla
izah edim. Bir qadın əri tərəfindən döyüldüyü ilə bağlı polisə müraciət edəndə
aldığı reaksiya əlsər hallarda “yaxşı arvad polisə gəlməz”, “ər adamı döyər”, “ailədə
olan söhbətdir” və s. olur. Yaxud bir qız yolda seksual qısnamaya məruz qalarsa,
dövlət olaraq, kimə müraciət edəcək? Məncə faktiki olaraq heç kimə. Yaxud bir
gay təcavüzə məruz qalsa, bu hüquq pozuntusunu kimsə araşdıracaqmı?
Həbsdə digər
dustaqlara məhkəməyə, prokurorluğa və s. ərizə, şikayət yazmaqda kömək edirdim.
Bir dəfə
bir hökm göndərdilər qonşu kameradan. Xahiş etdilər ki, appellyasiya
şikayəti yazım. Oxudum, gördüm ki, təqsirləndirilənlər (2 nəfər) ifadələrində
bildiriblər ki, bir seks işçisi olan homoseksualı taksiyə mindirib yolda maşını
saxladaraq onu soyublar. İndi məndən xahiş edirdilər ki, appellyasiya şikayətində
“onsuz da petuxdur da” “arqument”ini hüquqi olaraq, ifadə edim. İmtina etdim
yazmaqdan. Məsələ burasındadır ki, dustaqlar dövlət orqanlarının, o cümlədən məhkəmənin
seksual azlıqlara münasibətini bilirlər deyə, bundan sui-istifadə edirlər.
Dövlət
orqanlarının, vəzifəli şəxslərinin ailə-məişət mövzusunda, şəxsi azadlıqlar
müstəvisində bu gerizəkalı yanaşması çox geniş yayılıb. 24 ildir, davam edən mənəvi
aşınma isə bunu cəmiyyətə də sirayət etdirib. Onsuz da cəmiyyətimiz kifayət qədər
mühafizəkar idi, bu rejimin dövründə isə daha da mühafizəkarlaşdı. Ümumiyyətlə,
siyasi hakimiyyət nə qədər açıq olsa, cəmiyyət də o qədər açıq olur. 1985-95 bu
baxımdan bizim “qızıl dövr” idi. Stadionlarda rok konsertlər olurdu, bulvarda
uzun sıralarda gənclər öpüşürdülər, geyimdə dəblə ayaqlaşmağa çalışırdıq...
Çünki bir az demokratiya var idi, nəsə iş görmək istəyəndə alınırdı, ona görə də
camaat rahat idi, mövhumata qapılmırdı, xilası göylərdə, pirlərdə, falda
axtarmırdı.
90-cı illərin
ortalarına yaxın artıq repressiyalar gücləndi, siyasi rejim qapalı olmağa
başladı, cəmiyyət də qapandı. Məhkəmələrdə, dövlət orqanlarında ədalət görməyən,
mülkiyyət hüququ pozulduğundan pul qazanmaqda çətinlik çəkən insanlar çaş-baş
qaldılar, elə bildilər ki, bunun təqsiri açıq-saçıq geyindiklərinə görə Allahın
verdiyi cəzadır, homoseksuallara tolerant olduqlarından düşər-düşməz məsələsinə
görədir, Mirmöhsün ağanın qəbrinə az getdiklərinə görədir, arvada qulaq
asdıqlarına görədir və s.
Bəs birdən
siyasi hakimiyyət dəyişsə, nə olacaq? Bu, baxır hakimiyyətə gələcək insanların
açıqlığına, şəxsi keyfiyyətlərinə. Hazırda azad yaşayan və ya yaşamış xalqların
xeylisi bir liderin və ya bir qrup idarəedicinin şəxsi keyfiyyətlərinə görə
xilas ola bilib. Ona görə də müxalifətçilik yalnız siyasi hakimiyyəti dəyişmək
mövqeyindən ibarət olmamalıdır. Biz bu despotizmin bizə gətirdiyi bütün gerizəkalılıqlara,
qapalılıqlara, mövhumata müxalif olmalıyıq.
Homofob müxalifətçi
olmur.
Cinsi ayrıseçkilik
tərəfdarı müxalifətçi olmur.
Mövhumatçı
müxalifətçi olmur.
Qadınların
döyülməsinə azca da olsa, tolerant yanaşan müxalifətçi olmur.
Dərsliklərimizə
dini təbliğatın salınmasına tolerant yanaşan müxalifətçi olmur.
Bu rejimi
dəstəkləyən yazıçının, şairin dostu, repressiya aləti olmuş təşkilatın üzvü müxalifətçi
olmur...
Dəyər
daşıyıcısı olmaqla siyasi hakimiyyətin dəyişməsini istəmək fərqli şeylərdir. Bu
rejim azad biznes mühiti yaratsa (halbuki bu da mümkün deyil) belə adamların
çoxu gedib alverlərini edəcəklər, müxalifətçilik-zad yada düşməyəcək. Çünki dəyər
baxımından indiki rejimlə ciddi fərqləri yoxdur. “Siz iqtisadiyyatı
batırırsınız, camaat acından ölür, qoyun, biz gələk, iqtisadiyyatı qaldıraq,
amma başqa məsələlərdə camaatı batırmaqda davam edək” – iqtidarla dəyər fərqi olmayan
“müxalifətçi”lərin hakimiyyətə dediyi budur.
Söhbət
paranoyakcasına hər şeyin əleyhinə çıxmaqdan getmir, amma bu iqtidarın əleyhinə
çıxırıqsa, onun dəyərləri aşındıran, cəmiyyəti məhv edən hər şeyinin əleyhinə
çıxmalıyıq – homofobiyasının, cinsi ayrıseçkiliyinin, 60-cılar ədəbi nəslinə yaltaqlığının
və s. və i.a. Yeri gəlmişkən, indi sırf siyasi müxalif fəaliyyətə imkan
verilmir deyə, iqtidardan fərqli dəyər daşıyıcısı olmayan insanlar özlərini çox
tez yandırırlar, əleyhinə çıxdıqları iqtidara oxşadıqlarını biabırçı şəkildə
büruzə verirlər.
Comments
Post a Comment