Emin
Milli Əbülfəz Elçibəyin 1975-ci ildə yayıldığı iddia edilən məktubunu paylaşıb
və qeyd edib ki, “bu
məktubu yazan insanı heç vaxt dövlət başçısı seçməzdim. Elçibəyi bu gün də özünə
lider kimi qəbul edənləri, onun kultunu təbliğ edənləri isə özumə lider seçməzdim.
Belə məktubu yazan insan sonda Heydər Əliyevi hakimiyyətə gətirməli idi və
bunuda etdi. Həqiqət budur.”
Emin
bəyin kimə səs verməsi, kimi lider seçməsi mənlik deyil, sadəcə əsaslandığı
arqumentlər içərisində ittihamlar olduğundan bunlara münasibət bildirmək istədim,
çünki bəziləri mənim də ittihamlarımla üst-üstə düşür.
Məktubda
indiki əfv ərizələri stilində xahiş və “günahını boynuna alma” məqamları var və
Emin bəy də məhz bunlara görə Elçibəyi ittiham edib dövlət başçısı postuna
layiq bilmir. Məktubu oxudum və bir neçə məqam diqqətimi çəkdi:
1)
Yazının 9 abzasından cəmi ikisi (o da ən kiçik abzaslar) “günahını boynuna
alma” məsələsidir. Qalan hissələrdə nə deyilir? – rus dilinin hegemonluğuna
etiraz, azərbaycan dilinin gündəlik istifadə və rəsmi dil səviyyəsinə
qaldırılmasının vacibliyinin vurğulanması, rus dilinin zorla qəbul etdirilməsinə
konkret misallar, Azərbaycan əhalisinin əksəriyyətinin türk olması, tarixi
Turan dövlətinin bərpasının onların vəzifələrindən biri hesab olunması, Azərbaycanın
müstəqilliyinin vacibliyi, nəinki təkcə Azərbaycanın, eləcə də digər türk dövlətlərinin
müstəqilliyinin bərpasının, hətta digər türk dövlətlərinin Azərbaycanın
başçılığında birləşdirilməsinin zəruriliyi, bütün bu milli və taleyüklü məsələlər
naminə gənclərin birliyə çağırılması və digər bu kimi məsələlər. Təsəvvür edin,
1975-ci ildir, ABŞ-ən Vyetnam uğursuzluğundan sonra sovet təbliğat maşının
qılıncının dalı da kəsir, qabağı da, eləcə də SSRİ iqtisadiyyatı 80-lərin
enişinə qədər olan kulminasiyasını yaşayır. Bir sözlə, sovetin əleyhinə çxmağın
möcüzə hesab olunduğu vaxt yuxarıda yazdığım ideyalar əsaslandırılmış şəkildə rəsmi
mətbuatda dərc olunur. Mən inanıram ki, Əbülfəz bəy son 2 abzasdakı fikirlərinə
inananları öz hədəf kütləsi hesab etmirdi. Əlbəttə, istəyirdi ki, xalqın hər
bir fərdi beyin yumadan xilas olsun, amma müstəqilliyə qədər hansısa azlıq
etiraz etməli idi, çoxluq isə yenə də kölə olaraq qalacaqdı. Əbülfəz bəy də məhz
bu etirazçı azlığı hədəf alaraq, məktubun son 2 abzasadək hissəsində öz fikirlərini
yazmış və bu məktubda deyilmiş dəyərli fikirləri götürə bilən şəxslərə, xüsusən
gənclərə fikirlərini çatdıra bilmişdir. Əvvəldən öz silahdaşları olan şəxslərə
isə deyə bilmişdi ki, “mən onsuz da öz fikrimdəyəm, müvəqqəti çətinliklərə səbəb
olan işgəncələr bizi fikrimizdən döndərə bilməz”.
2)
Həbsdə insanın başına nə gələcəyini həbsdə olmayanlar heç vaxt bilə bilməz.
Həm də bu zaman hansı dövlətin hansı məhbəsində olması nəzərə alınmalıdır. Mən
15 gün Baş Mütəşəkkil Cinayətkarlığa qarşı Mübarizə İdarəsində həbsdə olmuşam və
yalnız psixoloji təzyiqə məruz qalmışam. Amma mən heç vaxt Emin Milli barədə
deyə bilmərəm ki, “O, həbsdə filan şeyi səhv edib.” Çünki mən onun yerində
olsam, necə davranacağımı bilə bilmərəm. Kimsə işgəncə altında dözəcəyini söz
verirsə, əmin olun ki, o adam pafosdan ağzı köpüklənən riyakardır. Əbülfəz bəyin
nələr çəkdiyini biz bilmirik, amma 1937-ni törətmiş dövlətin məhbəsində
olduğunu nəzərə alaraq, hesab edə bilərik ki, biz təsəvvür edə biləcəyimizdən
daha dəhşətli şeylər baş verib. Məhz bu dəhşətlərin təsiri altında öz fikirlərini
az-çox çatdıra bilən məktubu rejimə qəbul etdirə bilibsə, deməli, bu məktub
Əbülfəz bəyin böyük uğurudur.
Qaldı ki, mənim Eminlə üst-üstə
düşən ittihamlarıma: Elçibəy Heydər Əliyevi hakimiyyətə dəvət edən, o gələndə
isə, qanuni və milyonların ona etibar etdiyi postu qoyub qaçan, bizi hazırda da
davam edən dəhşətlərə məhkum etmiş, Azərbaycana ən böyük ziyanlardan birini
vurmuş şəxsdir. Necə ki, İsa Qəmbər öz cəsarətsizliyi ilə 2003-cü ildə Azərbaycanı
İlham Əliyevin caynağına atdı, Elçibəy də eləcə 1993-cü ildə bu ölkəni Heydər
Əliyevin ixtiyarına təqdim edib.
P.S. Bu məktubun yayılmasına görə,
tutduğu mövqeyə görə, xüsusən də məhz demokratiya quracağını iddia edən müxalifətin
əleyhinə çıxdığına görə Emin Millinin şəxsiyyətini müzakirəyə çıxartmaq, onun
keçmişini araşdırmaq əxlaqsızlıq, bloq postundan yan keçib başqa hansısa məsələyə
toxunub-toxunmadığını diqqətə çatdırmaq əslində Eminin fikri ilə razılaşmaq və
nəticədə riyakarlıqdır.
Comments
Post a Comment